早幾日睇半島電視台直播斯里蘭卡總理記者會，佢承認收到情報話會有炸彈襲擊(圖)，但係手下部門收到料都冇辦法處理。仲有，佢地仲追查緊恐怖分子啲錢同物資點樣可以運入斯里蘭卡。咁早排美帝仲大大聲話，佢地已經剷爆了伊斯蘭國老巢，但轉頭伊斯蘭國就可以響斯里蘭卡炸鋪勁。當然，有好多事後孔明話，美帝同盟友打到人地飛起，反而令佢地四散各地，將恐怖活動蔓延全球。
不過令人吃驚嘅是，呢班恐怖分子可以響新西蘭掃射清真寺事件後個幾月，就可以策劃一場咁勁的恐襲，如果係真，即係伊斯蘭國仲有大把力量及本錢。換個角度，如果係策劃了好耐，只不過撞正有新西蘭事件，先至用呢個做策劃斯里蘭卡恐襲的理由，咁比較似囉，因為，老老實實，計劃幾個人肉炸彈，唔係整pizza，係要策劃好耐。呢樣嘢證明，恐怖分子未必揀西方國家報仇，佢地一樣會選擇親西方的二、三線發展中國家，以前有肯尼亞、坦桑尼亞，依家到斯里蘭卡，都係前英國殖民地。
講開英國，May姐當然繼續多災多難，唔係天災，係政治災難。May姐無奈地都要搞歐洲議會選舉，咁依個時候嗰班脫歐政客又出番晒嚟選歐洲議會，乘機又大肆宣傳脫歐，順便又踩多May姐幾腳。但May姐斷估唔到，脫歐未傾完，蘇格蘭獨立運動班大帝又出來，因為蘇獨派係唔想脫歐。如果May姐衝去脫歐，佢地蘇獨就要脫英。呢場大龍鳳，戲碼未完，而且因為脫歐搞到陣腳大亂，愛爾蘭共和軍的餘黨，開始又搵機會反制，認為既然要脫歐，佢地就脫英歸愛啦，仲講咁多。政治搞唔掂之餘，仲有一班大哥大姐，依家響倫敦瞓緊街要求盡快解決氣候危機……。不過，大家好似比較關心曼聯隊波多啲，係未？
當然唔少得理解一下美帝總統選舉的選情。依家民主黨想選嘅人陸續出來。似乎民主黨內班大佬，響最後關頭終於搵前副總統拜登出來以一統天下。大家唔好誤會，以為美帝的總統初選係真民主。美帝政黨唔係剛性政黨，而係一個好鬆散的政客組合，合則來不合則去，同黨議員可以響同一議題而有唔同意見。但係，一去到大是大非問題如911，又或者總統選舉，梗係由背後黨內長老操盤啦。咁好清楚：依班黨內精英唔想左翼大哥桑德斯突圍而出，於是就響舊電池堆搵個前副總統出來競爭。
問題係，拜登過往好鍾意扮慰問之時，乘機響女士耳邊講嘢，好似好熟咁，但係我估如果正常人咁樣做，女士早就一巴掌星過去。有拜登支持者話佢只係熱情好客，冇其他意思。講到尾，拜登後台夠硬，係未？Metoo可以當冇事。但係，拜登咁樣畀人欽點去選，得罪自己友，侵侵隨時玩多四年。
倫敦大學亞非研究學院法律系博士