同Sunny Lau認識時間其實唔長，但奇怪地，一拍即合，由《書到用時》到依家拍住上一齊做導演搞電視劇，每一步都好勇，好癲，好離經叛道，但奇怪地，又真係夾到喎。
由細到大都習慣單打獨鬥，拍檔呢兩個字對我嚟講太遙遠，莫講話有人可以陪你一齊面對一齊驚一齊衝，講真，響某大台來回地獄又折返人間，身邊人唔隊你唔害你都已經還得神落，仲癡心妄想可以遇到知心友或者戰友？係咪太大貪咗啲呀？
人同人之間嘅相遇的確奇妙，遇上Sunny之前我諗都唔敢諗自己可以有個拍檔，雖然同少爺占都夾咗好多年，但始終佢同阿奴先係一對，我同佢再夾都只係婚外情，學森美話齋，關係錯，其他幾啱都唔啱，所以………
所以，遇到Sunny呢個同屬山羊座嘅拍檔，感覺真係好奇妙。我穩陣底，做唔到100分嘅我唔會講亦唔會做，但佢呢就相反，1毫子吹到100蚊，咩都應承咗先，講咗再諗做法同辦法；佢天生樂觀，相信明天會更好，我就天生悲觀，永遠覺得點解打波先嚟落雨，佢有讀寫困難，寫出嚟每個字都係錯別字，我就最鍾意寫字，我寫咗20集劇本佢先開始睇緊頭幾集，但就係因為大家都咁南轅北轍，先至夾得埋，先有火花………
我唔敢講可以同Sunny呢條友可以拍住上幾耐，早十年遇到佢，或者未如今日呢個時候相遇咁精彩，畢竟每個人發酵同開花嘅時間唔同，心態亦唔一樣，但且行且珍惜，無論將來點，我都會感恩喺呢個人生階段遇到佢，一齊拍咗個咁癲嘅「讀書節目」，再搞咗個共編共導共演嘅超高難度電視劇，有過呢段難忘回憶………