唔好以為度橋好似「佛系」咁，下下隨緣！現今資訊氾濫，每個廣告人都需要絞盡腦汁，誓要度一條絕世好橋！Ray星期日出席由am730主辦嘅第3屆全港中學學界廣告賣橋王頒獎禮，見到一班學生哥啲廣告作品都有板有眼，令人驚喜！尤其盟主嘅培僑書院同學仔，好鬼馬咁扮相撲手去softsell產品係Made in Japan，劇情抵死啜核，氹得廣告商超開心！
今次比賽可謂真實廣告界嘅縮影，評審團由多位業界精英擔任，陣容鼎盛。頒獎禮當日，超過300名名校師生聚集喺理大蔣震劇院，共頒發71個獎項。Ray見到有得獎學生開心到連獎都唔記得攞，但正如am730社長盧覺麟致辭時所講，得到頒獎禮呢張入場券已經證明獲得肯定，同樣值得高興。
今屆盟主透露，用咗約3個月時間製作成套廣告方案，每個同學要度3條橋，再於十幾條橋中篩選出相撲手橋去sell品牌產品係Made in Japan，貪其夠有代表性又夠funny，就連廣告客戶都大讚佢哋個idea生動！本身教開Art嘅黃老師話，活動上都幫到同學喺視覺藝術上運用，學識資料搜集等，但始終輸贏其次，投入先最重要！
