昨日幾份免費報頭版都見到曹星如為體育品牌Nike拍的紙版廣告，滿街都見到人拎住，非常矚目，好難睇佢唔到。廣告中的曹星如，氣勢十足，拿著香港區旗，霸氣地宣告向2020奧運進發，呢個紙媒廣告同佢於上周友戰中華台北拳手江奕宏後，正式宣布日後將以業餘拳手身份，向着「為香港而戰」的夢想重新出發，可謂互相呼應。由職業轉業餘，好體現Dream Crazy精神，又一次完美示範大品牌的精確市場策略，不需硬銷，更能扣動人心。
曹星如係Ray的偶像，打不死的精神亦感染唔少香港人，正如全新Nike - Dreamers: Rex Tso 影片中對曹星如職業生涯的回顧，15年來曹星如由一個普通人打到變成「神奇小子」；由每個回合40拳打到變成120拳；由只有300人睇拳賽，到全港700萬人陪着打……一幕又一幕血與汗的影像，剛好同品牌的Just Do it精神不謀而合。原來31歲的曹星如，一直對08年未能代表香港到北京比賽耿耿於懷，每次去到國際賽事場合說自己是來自香港時，總會聽到「原來香港有運動員嗎？」的回應，曹每次聽後都啞口無言，想反駁卻又沒有資格，今次就要以行動證明「是有的」。且看佢今次放棄職業拳擊生涯帶來的光環，到時為香港踏上奧運的擂台，會有怎樣的表現。