上月成功登上珠穆朗瑪峰頂嘅中學老師曾燕紅(Ada)近排成為城中焦點人物，但原來成功背後亦有賴唔少人嘅幫助。Ray噚日見到Ada得知原來佢第一次踏上珠峰征途嘅時候，向銀行借咗32萬元登山費，打算返港後用7年時間節衣縮食去還款。2014年經媒體報道後，獲「匿名人」贊助為Ada還款，令Ada可以無後顧之憂，繼續向目標進發。
雖然嗰次Ada當時未能成功登頂，但「匿名人」仍一直鼓勵佢話「有夢想就去追吧」，Ada獲鼓勵後，第二次試登珠峰卻遇上雪崩，「匿名人」嗰句說法仍在腦海出現，故繼續堅持，亦造就今年繼續登頂。屢敗屢試，Ada話︰「我想證明俾佢睇年輕人真喺會堅持落去。」同時亦勉勵學生追夢過程中可能會遇上好多困難，但總會有方法解決。
Ada稍後會參加本月21日舉行的意大利Lavaredo Sky Running比賽，及下月15號的瑞士艾格峰(Eiger)超級越野賽。圓夢要有經濟支持，幸Ada已獲旅遊網站Expedia贊助佢喺兩個賽事嘅機票及酒店費用，估計約需6萬元。完成賽事後，佢會喺8月去歐洲環勃朗峰超級越野耐力賽(The Ultra-Trail du Mont-Blanc)場地視察，為來年的比賽作準備，未來亦打算與學生一齊寫書講述自身經歷，但遺憾父親早已逝世，未能見證佢成長及分享喜悅。