全港「吸水」力最強的政黨民建聯，將於11月26日舉行兩年一度籌款晚會，當晚節目細節仍有待落實，不過已知的表演節目亦相當有瞄頭，包括三位前高官載歌載舞，仲有民記兩位前主席「肺噏」，同場亦會拍賣已故國學大師饒宗頤的墨寶。
晚會將於會展筵開逾70席，今次「賣枱」設三級制，最平一席盛惠8萬8千，最貴高達28萬8千，聽講70幾圍已悉數被認購一空，單計「賣枱」已進帳不少，仲未計更可觀的拍賣收入。
民建聯過去兩次籌款晚會，時任中聯辦主任的張曉明分別提字「駿程萬里」及「度德而處」，兩幅墨寶分別籌到1,380萬及1,880萬，真係字字值千金，唔知「西環」揸弗人王志民今次有無嘢捐俾民建聯拍賣，不過，一位有心人就會捐出「饒公」饒宗頤的墨寶俾民建聯拍賣。
饒宗頤 (資料圖片)
至於當晚演出節目，民建聯黨友蘇錦樑請來兩位前同事譚志源同高永文，三位前局長當晚將會夾band唱歌跳舞，無錯，係跳舞，而且好似係跳Hip Hop添，當然會有dancer一齊跳，睇嚟佢哋都要苦練一番。
順帶一提，籌款晚會將在立法會九龍西補選翌日舉行，唔知到時會唔會當埋慶功宴呢？
蘇錦樑
譚志源