香港不時都有國際級馬術比賽舉行，Ray最近就聽聞在今個星期舉行的「香港馬術大師賽」中有個幕後功臣。負責設計今次比賽場地的單泰康(Michael)，佢係馬會場地主任兼設計師，亦係目前本港4名擁有馬術場地設計師資格之一。
Michael同Ray講，佢入行前係馬會的水電維修員，因要負責比賽的計時儀器，逐漸認識馬術賽事的佈置和設計，加上自己之前亦有學習過馬術，01年便獲公司安排到台灣考取「一級場地設計師」資格，正式入行。
要佈置一個符合標準的馬術比賽場地並非「搬搬抬抬」咁簡單，Michael指，除了賽道安排要顧及馬匹跳躍和轉彎等動作外，沙地的濕度和鬆軟度亦會影響馬匹跳躍能力，加上馬匹的視力較弱，因此要以深色和多花紋物料製作障礙物。而為了確保比賽的公正，欄杆的高度和距離都不能有偏差，賽道安排亦要到賽前半小時才能公開。
對於即將到來的馬術大師賽，Michael就話，今次最大困難在於賽事要直播，佈置時間只有30分鐘；而且20多名工作人員都係義工，自己要從零開始以「雞精班」為他們進行特訓，務求比賽當日的安排和佈置不會有任何差錯。