幾位師傅專心入廚。
Ray昨日有食神，獲邀試菜，一次過試齊添好運同國福樓兩間著名食肆嘅出品，配埋黃大鈞配嘅餐酒，勁正！點解咁有口福？皆因香港旅發局本月18至21日會去法國參加兩年一度的波爾多國際葡萄酒及烈酒展覽會(Vinexpo Bordeaux 2017)，呢個酒界大型活動雲集全球近5萬業界精英，仲有多達1,200名記者出席。旅發局當然唔放過機會，於展覽期間在河畔搭建一間「香港餐廳」，乘機宣傳香港是亞洲美食之都，亦是亞洲重要葡萄酒樞紐；於是邀請米芝蓮名廚同行遠征，包括添好運的麥桂培及梁輝強師傅，及國福樓的葉卡安師傅，配合曾在香港工作7年的法國名廚Jérôme Billot，共同主理呢間「香港餐廳」，主打港式料理。Ray敬陪末座試下菜。
先試添好運的港式點心拼盤，包括「冬菇燒賣皇」、「鮮蝦露筍餃」、「雞絲春卷」、「羅漢上素粉果」、加埋新研製的「沙律魚米多士」，十足驚喜，當然唔少得出晒名嘅「酥皮焗叉燒包」，新鮮出爐又確係好味到呢，添好運培哥仲俾貼士話，如果買外賣，千祈不要將酥皮包放入微波爐翻叮，最好用焗爐，或者燒紅個鑊熱下佢，當然都係新鮮最好食。至於國福樓葉師傅的「花雕蛋白蒸龍蝦球」及「砵酒炆牛尾牛脷」兩道主菜，亦是一絕。Ray預祝幾位師傅此行成功，相信各國人士都會被港式料理美食征服。
