蔡少綿
本地疫情第四波殺到埋身，一向同傳媒關係良好的港鐵高層、公司事務總監蔡少綿(Linda)亦受牽連，人人WFH之際，佢就要WFC(Work from camp)。事緣佢辦公地點早前有同事確診，Linda已立即做檢測，結果為陰性，以為安心之際，第日接到衛生署通知話佢被界定為「緊密接觸者」，要入竹篙灣隔離，計返仲有幾日先至夠期出Camp。Linda於社交平台講返今次經歷，除咗讚工作人員專業外，最大感受係連續好多日幾乎沒有和任何實體真人接觸交談，記憶以來好似從未試過，雖然現今網絡發達，日常工作仍然繼續，例如不斷有online會議同覆電郵電話，放工後如常上網見朋友，前晚仲可以聽埋今年太古Symphony Under the Stars網上直播，但期間缺乏了人與人之間的互動，總是有點缺失。Linda又話明明有逾千人同時留在營內，但平日周圍靜若止水，冇乜人聲，營裡面感覺好surreal。有網友仲留言開食字玩笑，話Linda今年初由迪士尼轉戰港鐵，始終都係離開唔到迪士尼嘅「隔離」。Ray在此祝Linda早日平安出營。
隔離營室內情況。