演員要學啲乜？好多人以為演員唔使學，即係不學無術，會做兩個表情就得，咁即係好似識唱卡啦OK就係歌唱家一樣，對表演藝術一無所知。
以下我話俾大家知，一個演員基本要學啲乜。記住，係基本咋，唔包你可以成為偉大演員或者藝術家㗎。
演員首先要學會運用自己身體、聲音同埋情感，仲有基本文化修養。先講身體，我哋唔係運動員，唔係舞蹈家，唔係武術家，基本上演員乜都唔係但係又乜都係，演技有一套特別嘅形體訓練法，形體訓練係學習如何控制身體每一部分，了解自己身體及增強體質，增強體質並非要你做大隻佬或身材曼妙嘅靚女，如果係咁，演員就只得一種身形，肥或瘦都唔使做喇，角色於是得一種，做乜角色都成個健身教練咁。學習形體主要係增加身體嘅寬廣度、柔軟性，令身體變得更加適合創作，當然，有強健嘅體格都係好事，但係不能過於特別，因為演員創作講求變化，我哋演嘅係角色唔係自己，所有工具適中最好，最容易變化，過度自戀嘅人一定唔會係好演員，演員嘅魅力來自佢哋嘅自信，同埋藝術修養氣質，演員唔係模特兒，冇一定嘅身形標準要求，唔需要完美身材，需要嘅係一個能夠靈活變化嘅身體，好似橡筋咁冇乜睇頭(為角色特別創造身形唔算)，但係可塑性高。
「神戲劇場」藝術總監，香港藝術發展局戲劇界代表，兩奪香港電影金像獎最佳男主角及最佳男配角，香港演藝學院校友會榮譽主席。