年宵年年有，喺香港都有近半百年歷史，今年有團體決定來一個「年宵2.0」，由年廿七至年卅晚(1月24日至27日)，一連四日在中環海濱摩天輪下舉行首個中環大型花市。係呀，真係中環。
由FEED主辦的中環年宵2.0 (Mart in Hong Kong)，成個年宵市場劃分咗幾區：生活品味區、餐飲美食專區、乾貨區、酒吧暢飲區及互動遊樂區，超過80個精選攤檔。仲有多間米芝蓮食肆、星級餐廳、創意手作、手辦模型等參展商進駐，行花市得嚟都要站在時代的最尖端，好多個品牌都係市面最潮最時尚的牌子，連旅遊達人杜如風創辦的品牌FUNGOLIA都有擺檔。
而餐飲美食專區佔年宵最多攤位，有近30個。最矚目當然有米芝蓮街頭美食區，當中有18座狗仔粉為你帶來馳名狗仔粉、招牌火鴨翅等精選地道美食；而本來年初六先會喺香港景點見到美食車正式營運，但今次主辦單位邀得當中三間美食車得主進場，就係豪園小食、有得餃及樺得園。啲嘢好唔好味、啲貨夠唔夠潮，就俾唔到答案住，不過喺摩天輪咁浪漫嘅腳下喺中環行花市，仲會有機會撞啱時間睇到LMF及Supper Moment場內獻唱，仲可以第一次試玩華麗透光嘅彩虹攤位「雞不可失 Rainbow In The Mart」，擲中彩虹會見到3D彩虹，咁多過癮嘢玩，就真係啱晒Ray呢類潮人啦！