在家等了一個多月，處處不受歡迎的肥珍終於收到國家任務！係一班凌晨來往曼谷的航班。因為放假放得太耐，懶到床也不願落，更唔好話如何提早時間起身化妝沖涼穿制服。終於拖到last minute，才急急腳準備，但發覺件制服已經拉唔到拉鏈……情急之下，惟有用個萬字夾求其夾住，加釘書機打釘鞏固，再穿件外套，如果唔除，應該就無事。
急急腳衝到機場，已經唔係你諗咁樣。冷清到只見到保安，每個櫃位都熄晒燈，連海關都只開一邊。我似個盲頭烏蠅周圍問人點入去，搭咩車(禁區內無人駕駛列車都停埋)先去到個閘口，而且現實係搵到個人都難。
好艱辛才入到禁區，去到個閘口，燈光昏暗，特別係夜晚。落地大玻璃窗外停泊了無數飛機，室內杳無人煙。前不見人，後不見來者，像是進入了拍攝片場，稍有動靜都會令人不禁打個寒顫。
這夜來回曼谷回程只有零星客人，我那行只坐了兩個阿伯。但由於安全原因，安全演示還是要做全套。我對著呢兩位身穿3M防護衫的阿伯，以及空無一人的座位完成了演示，明明沒有人，感覺卻很詭異。
捱了個清晨終於返到屋企，先發覺身上的書釘應該是在做安全演示的時候，已然全數爆開。 肥、毒、宅的空中服務員。