被廉署拘捕的人士，不少是「白領疑犯」，有點學識，斯斯文文，也有流氓惡霸，粗口橫飛。某日清晨時分，我和同僚到某豪宅拘捕某犯罪集團主腦，正在搜查單位：
我：「乜生，呢間房鎖咗，開埋睇睇。」
乜生：「XXXX！呢間房係我個女，你唔X好搞呀！」
我：「乜生，張搜查令寫明我獲法庭授權搜查你個單位，我點知呢間房入面有無涉案證物？快啲叫你個女開門！」
乜生暴跳如雷：「X！唔X開！有本事就爆門，XXXX！」(下刪數百字粗口)
同僚：「廷SIR，使唔使Call Support爆門呀？」
我：「唔使住。乜太，你過嚟！」
乜太戰戰兢兢：「咩事呀SIR？」
我：「嗱！我解釋你聽廉署點爆門：我哋會用條幾十磅撞錘，對準門鎖位置撞埋去，到時門鎖門框都會爆爛飛脫，你想個女俾人爆門嚇醒，定係你叫佢起身？自己諗諗啦！」
乜生坐在超巨大廳的華貴梳化繼續咆哮：「老婆唔X好理佢！！！XXXX！！！」
乜太停一停，諗一諗，無奈地敲門：「阿女，你起身未？你開開門啦！屋宇署嚟查漏水呀！」
如此黑色幽默，我和同僚極力忍俊，保持嚴肅專業形象。
一分鐘後，乜小姐開門：「屋乜X嘢署呀？老竇都唔係第一次㗎啦！阿SIR，你慢慢啦。」
乜小姐見慣風浪，深明大義，最終搜查房間亦無發現，「屋宇署人員」隨即將疑犯押走繼續調查。
E-mail：[email protected]