因為你係領養返嚟嘅，所以我一直唔知你幾時出世。
你喺復活節嚟到我地呢個屋企，根據你甩牙仔嘅日子推斷，你應該係5月出世嘅，金牛座，沉迷美食同享受，但真心Sorry你老竇我連自己生日都得過且過，唔想慶祝，所以你嚟咗呢個家兩年，我都冇好好同你慶祝過生日，更莫講話好似其他狗狗咁，響Party Room請埋一大班狗仔朋友，又蛋糕又大合照咁………
但係冇咁做唔代表我忘記或者唔重視，其實由一開始我已經幫你決定咗，每年五月佛誕就係你嘅生日，因為我信因果，更加相信你咁巧妙嘅出現，以至我同你嘅相遇，其實都係有因有果，應該係因為我上一世做咗啲好事，今世先至可以遇到你，成為你主人，呢一點，我一直感恩銘記………
嗱大龍鳳就冇啦，但有你最鍾意食嘅蛋蛋，同埋親手整嘅生日點心，玩具就慳番啦因為已經一地都係，生日願望呢，如果俾你許，你肯定都係希望一日食七餐，餐餐大魚大肉，或者一日落街七十個七次㗎啦，呢啲唔等使嘅生日願望不如唔好許啦，你老竇我代你許啦，嗱，我呢就只望你繼續健健康康，日日開心精靈，唔需要快高長大，唔需要幾叻幾乖，但求你無災無難到公卿，我已經心滿意足………
沒有刻意選個日子刻意討好誰，共你只要相愛就不會心虛——但願我地每個平常小日子都溫暖踏實。我愛你。小秋妹，3歲囡啦，生日快樂。
#來場小小的派對倦極同時進睡 #容祖兒召喚
#係咪又要清唱張衛健身體健康 #生日食紅雞蛋是我家傳統 #果然有遺傳
周二刊登