我個仔今年8歲。8歲是個怎樣的年紀？8歲是個開始懂得跟同學仔比較的年紀，卻又搞不清，甚麼算是贏、甚麼算是輸的年紀。例如，他們會跟同學仔比較，誰的屋企面積比較大一些，又會比較，上一次搭飛機你是坐商務還是坐Econ……諸如此類，當然到了最後，這些所謂比較，到最後總會淪為一班小學雞互相吹牛的局面，聽他們轉述同學仔「吹」些甚麼，有時候的確挺有娛樂性的。然而，讓我隱隱感到有點不安的是：點解依家班細路，互相比較的東西總是會和錢扯上關係的？抑或其實我們自己當年也是一樣？
這班8歲的男孩子，還有一樣會用來互相吹牛的，就是自己老竇有幾勁，有幾多成就。阿仔話，坐佢隔籬的同學，佢爸爸好勁啲，在大公司做高層。「咁又真係幾勁嘅，坐嗰啲位唔係咁容易㗎……」我說。
「老竇，你有幾多個人跟住你呀？有冇一萬個人？」阿仔問：「同學話，佢爸爸有一萬個人幫佢做嘢㗎喎。」
「一萬人？」我笑了笑。那位同學仔的爸爸，我認識的。有次聚會我們交換過卡片，的確是個大公司高層，但一萬個下屬就肯定是同學仔吹牛了：「爸爸梗係冇啦……」
「係呀……」囝囝好像有點失望：「佢仲話佢爸爸出trip係坐私人飛機㗎……」
「哈哈，真係？」我又忍不住笑了：「爸爸平時出trip坐Econ咋喎。」
「咁樣，係咪佢爸爸即係咪叻過你好多？」囝囝問。
望住阿仔，唔知好笑抑或好嬲。「自古以來」世人去衡量男人的成就，都總是從他有幾多財富，揾到幾多錢去入手。再深入一點，也許會看看，他有多大權，手下有多少人。「有錢又有權」這些所謂成功標準，除了帶給人充裕的物質生活外，對很多人而言，背後還隱含了對一個人的能力、智慧的評價。一個表面成功的人，斷估應該也是個有能力有頭腦的人吧？至於那個擁有一千萬身家的人，也理所當然地應該「叻」過那位只有一百萬身家的人吧？將評價一個人的方法，簡化到這樣的一個地步，當然是極膚淺的行為。然而一個8歲的孩子，沒有甚麼人生經歷，去比較「邊個叻啲」的時候，只懂得用這些可以量化的標準去計算，我覺得無可厚非。但當他逐漸長大，他應該會慢慢明白到，每個人對成就的要求也不一樣，絕大部分的事情都冇可能這樣直接去比較的。而去評價一個人的成與敗，更絕不可能單憑其事業和財富去計算。事實上，我認識不少事業成就很高的人，家庭和婚姻也搞到一塌糊塗……若要評價這些人的人生，應該說他們是成功還是失敗？
「哈哈，可能佢爸爸叻啲啦……」我跟囝囝說：「其實呢，到你遲吓長大咗，好似爸爸咁嘅年紀啦……睇返轉頭，會覺得自己一直以嚟都有個開心嘅家庭的話，咁爸爸就算係叻嘞。今日去講，仲言之尚早。」