前晚三名特首候選人曾俊華、林鄭月娥、胡國興，一齊出席7台聯播選舉論壇，同台激辯時，林鄭月娥突然公開稱讚對手曾俊華的助手「阿聰」，聲言挖角，令呢位幕後玩家成為網民焦點，一輪洗版之後，「肥仔聰」更索性破例走到幕前，昨日傍晚拍了一段「拍住上」的短片，上載到曾俊華fb，片長6分幾鐘，真情流露，頭4個小時已經累積到27萬次瀏覽，逾5千個分享，係幾爆。
真名羅永聰嘅阿聰，來頭其實不少，出身名校皇仁書院，於香港大學取得法律學士及新聞碩士學位，曾任明報採訪主任，認識唔少記者行家，佢5年前加入政府任職財政司長政治助理，最近與上司曾俊華同日辭職，加入競選團隊做義工。講真，薯片叔叔近年的親民形象，阿聰亦有份打造。一向低調嘅佢在片中大讚好幸運遇到一個好老闆。
Ray與阿聰份屬街坊，有時見到佢百忙之中，都會做下住家男，去超市入貨，唔知佢到3.26之後，會唔會繼續同前上司拍住上，定係被挖角呢？