初拍拖3個月不到的女生拉男友陪她逛結婚博覽，其實也沒有催婚的意思，只是女生嘛，覺得有趣好玩，又想趁熱戀期事先預覽一下未來甜蜜憧憬，未出發先興奮，兩人還年輕，未來太遙遠，但睇咗當結咗，都好過冇吖。
可惜男友就是不明白。星期六日婚紗展又好結婚博覽又好，墟冚過工展會，人多擠迫，全部都是錢錢錢和錢，結婚旅行、婚紗相package以至酒店酒席，普通男生被拉進去，只有滿滿的挫敗感，加上稍一不慎，發覺在場其他恨結婚的情侶，條條女都索過自己嗰條，樣貌身材性格都似乎更加優勝，自己條氣就更唔順，人結我結，點解人哋個未來老婆正咁多？
很多女生都喜歡捉男友去逛這些展覽，以為這就叫做「暗示」男友快點把結婚計劃書交出來，盡快落實，可惜對男人來說，這根本不是暗示，而是明示，擺明話你知，咪再詐傻扮懵拖得就拖啦吓，如果你再唔做嘢，唔婚就分，大家醒水，唔使畫公仔畫出腸吓話……？
只是男人都是迫不來的物種。愈迫愈反抗，愈迫愈不想結，就算男人明知過幾年點都要結，但由他們自己的起心肝去結，跟他們被支槍指住個頭迫住佢結，心態到底不一樣，婚後條氣順唔順，有起事上嚟會唔會爆一句「當初係你話要結之嘛關我鬼事」，分別也很不一樣……
如果沒有十足自信，就別亂來，讓結婚博覽變成「想結婚搏攬炒」的縮寫。
