依家講侵侵，講美中關係，真係要小心。好多時，有兩個唔同之思考解讀。假如你睇得多美帝自由派的媒體，你就會以為，侵侵依家跪低了，向中國示好了。假如你係睇得太多美帝右派媒體，咁你就出了事，以為美帝個個都係想向中國開刀，聽日就開戰了。
其實呢幾十年以來，一直有好多個框架，畀美帝政府去搞美中關係。主流的想法，就係要用engagement的方式，去處理美中關係。即係美帝行政系統之主流，係覺得唔應該同中國硬打，咁樣係冇意義。唔係話美帝唔夠打，而係為乜要同中國去撼呢？佢地呢個講法係，最好係用和平的方式，將中國慢慢導向西方式的自由民主之發展。咁樣對世界和平係最有利的。
要做到咁樣，呢一派主流就覺得，唔應該單單都同中國硬打硬砌，而係要用一個engagement的方式，有對話有交流，有時就迫一迫，有時就硬一硬，咁樣慢慢將中國拉入去西方世界建構下的秩序。所以，呢個主流係唔主張打，但就不怕打，而係主張有砌有傾。但係，響美帝，剩係論述，都百花齊放。有另一派之論述就覺得，呢個engagement，真係冇乜用。因為佢地話，又砌又傾，與其話將中國拉入世界秩序有助佢地和平演變，結果就養肥了一個好大好強的經濟強國，過往三十年，美帝將中國帶動成為一個超級大國，依家呢個中國反而成為了美帝之競爭者，甚至危害緊西方國家響呢幾十年建構出來之世界秩序！
呢一派（響美帝政府中唔係主流）就主張，要對中國硬，係真硬，真係要不惜武力（唔係不惜武力之決心），先至可以馴服北京。於是，呢一派就覺得，要全方位對北京強硬，軍事上要用盡手上武器幫亞洲盟友，對準北京。至於響經濟上，唔使對北京客氣，用盡手上可用盡的經濟手法，例如貿易措施，日日去砌住中國。
佢地覺得，北京受硬不受軟，只要盡用美帝的power，咁北京先至跪低。就係響呢套思維下，北極熊普京，梗係唔係敵人啦，只要聯合得到普京（唔使結盟啦，只要友好），咁樣就可以聯俄制共，迫北京接受一套由美帝（唔係西方，而係美帝一個）建構下的新秩序。
呢個說法，一直都係少數說法，唔係美帝政府內部以至智庫之主流。陰差陽錯，依家侵侵偷雞之後，呢個說法就咁樣入了去白宮，成為了「主流」。死火，呢套說法同過往做法相衝，即係做開又砌又傾之官員，依家要佢對住北京玩真的，喊打喊殺，要長毛上身，唔可以囉。
當然，響上面兩個論述之中，仲有第三、四種論述。但點都好，依家係兩個截然不同之論述響白宮互劈之中，隨時可能劈足一年半載，未對中，先內鬥。我地隔岸觀火，真係要戴定頭盔了。