有讀者問我投考廉署助理調查主任的意見，其實我無考過，胡說八道如下：
外表：無乜所謂，無論貌似「唔唱K」儀表堂堂，或好似我一個招牌跌落嚟擲死幾十個，都各具優勢。見工時，男士啲耳環就無謂戴喇，白襪留番踢波先著吧；女士唔好濃妝，除非你有夏蕙BB咁靚女啦！
中文：要識得從一大堆廢話(絕大部分人係咁講嘢㗎)中找亮點，有條理表達，因為寫口供是bread and butter日日要食，搞唔掂，無運行。
英文：唔講得都要寫得，唔寫得要睇得。入咗去，唔寫得都會逼到你寫得。正所謂「英文精，好易升」。
普通話：好過馬交第一把交椅「笨忍吹西安」同發音相當唔純的「純官」，就肯肯定有分加。
數學：數口精，查案醒，但唔使精算嘅。如數口差，入到去個個月填複雜過報稅表的交通開支申請表，包你唔醒都變醒。
常識：大大Sir話齋Common sense is not common，做廉署無常識，好快全公署都認識。
工作態度：師兄教落「襟X(自己想像啦)、爛做、無詐型」。
面皮：唔薄得，即係厚，除了因為要「襟X」，仲要應付斯文敗類和黑幫流氓。
體能：咁多紀律部隊中，要求低到近乎無(按本人標準而言)，基本上四肢健全，身體健康即可。可以的話練下手腕扼力和掌上壓，體能測試唔好太肉酸。
人生觀：覺得人性純潔如「小白兔、小綿羊」免問。
個性：前輩教落「人和則事順」，識DO有運行。
品德操守：最緊要唔好學湯顯明、穆斐文。
前景：一片光明，正值退休潮，青黃不接極嚴重，十年由助理調查主任升至三粒花大有人在，快過坐火箭，當然要視乎閣下能力和官運。
忠告：《廉政行動》的廉署人員飛天遁地、跳海飛車、吳宇森式的槍戰肉搏場面，純屬戲劇效果，不能當真。現實情況是要應付大量紙上調查，行政手續，送遞文件資料，不會如戲劇刺激，但亦絕不沉悶。其實照照鏡，對比《廉政行動》的男女明星外表，就知道現實的殘酷。