每個人，都喜歡活在其舒適圈中，去慣去的餐廳，剪一向剪開嘅髮型，染一向染開嘅顏色，著一向著開嘅衫褲款式和顏色。舒適圈令您覺得安全，唔會錯，但日子久了，連自己都覺得沉悶。其實每一次新嘗試，就算結果最後未必最好，但起碼能帶出新鮮感。
要鼓起勇氣跳出自己的舒適圈並非易事，特別係工作事業方面，因為始終有經濟負擔，太多方面要考慮。對我而言，令我可以下定決心，義無反顧跳出去嘅原動力，往往來自負面力量。
More女四十多年人生路上，跟余春嬌講過一樣，曾經遇過不少人渣，他們嚴重自卑得只能從傷害別人當中才能尋找到自己價值，看見別人傷心難過，才能得到快樂，面對這些「人渣」，我絕對唔會低頭，相反，只會令我愈變愈強。你話我做唔到咩，我偏做俾你睇，你話我肥，只能著黑色鬆身衫咩，我偏要著淺色或鮮色有cutting，有detail嘅靚衫你睇，你話肥妹點扮都唔靚，我就扮俾你睇。你話more女時裝冇得做，蝕硬，我偏要試做，就算蝕晒就當交學費進修，就係咁，我跳出一又一個舒適圈，而我嘅世界亦變得愈來愈精彩。人生只有嗰幾十年，您哋準備好跳出你地嘅舒適圈，去睇去過一個更精彩嘅生活嗎？