近排創業氣氛濃厚，商界又開始諗下有咩可以幫到初創企業，貿發局昨日推出初創企業培育計劃「創業快綫」，除了邀請城中大企業及基金會支持外，仲有謝霆鋒，佢今次唔做Chef Nic嘞，轉做NiCUBATOR，即係佢新成立嘅創業平台「鋒助人生」，擔任incubator嘅角色，孵化培育初創企業，協助入選10強嘅startup宣傳推廣。
Ray昨日去咗貿發局嘅午餐會，了解計劃詳情，知道合資格參加嘅startup係成立5年以內、核心業務設於香港及集資額低於1,000萬美元嘅公司，於下月16日截止報名後，就會由評審選出40家，面試後選出20家進入決賽，最後10強就會獲得等值約16萬港元嘅推廣資源，主要用於參與全球的商貿活動。
金額唔算多，貿發局副總裁葉澤恩話，呢個計劃唔係提供資金，而係類似mentor咁與startup攜手同行。在席嘅兩位成功創業家，經營AR技術嘅ConncetAR營運總監雷立基，以及建立億元手機殼業務嘅Casetify創辦人兼行政總裁吳培燊，亦認同只要產品掂，人脈與經驗便有助startup找尋資金。
昨日雖然見唔到霆鋒真身，但都有佢喺鋒味控股的聯席創辦人、已故全國政協副主席安子介外孫楊鼎立到場，並帶來霆鋒分享創業心得嘅短片，同場仲有團結香港基金總幹事鄭李錦芬、創科香港基金會總幹事慕林杉、香港天使投資脈絡主席譚偉豪及海闊天空創投聯合創辦人文立。