乘務員的人工除了底薪，靠的就是地面時數、飛行時數和外站補貼。現在不少航空公司的航班銳減，作為乘務員的我們好似放緊大假，roster幾乎每日都會被改更。望住日漸減少的飛行時數，和同步下跌的戶口存款，對人生充滿感慨。
上周有一更從凌晨就開始standby，因為無鐘，不敢貿貿然請假，但如果飛大陸點算？就在忐忑間翻來覆去，隔15分鐘check一次電話，check到凌晨2點終瞓，但估唔到不到1個小時，電話還是響起。今次唔係幻覺，係堅要返工，而且仲要係北京……我的心狠狠地揪了一下。抱著一去不復還的心態硬著頭皮趕去機場，先知今班所有crew連機頭都係新call，即係代表原本同事無人肯返……雖然戴住口罩，但從大家滿布血絲的眼神都見到當中的無奈和眼瞓。
上機的一刻，我地用消毒噴霧灑滿自己的坐位，好似手術室咁做任何事都戴手套，再瘋狂洗手。即使跟客溝通都盡可能保持遠距離，如果可以用擴音器嗌就最好。以為萬無一失，但客人總在你的毫無防備下除底口罩再乾咳兩聲……話說這來回兩程的客人打扮也各有千秋，有的戴了5個口罩，有的死都唔肯靠向背墊，坐到好直；有的著雨衣加護目鏡，好似進入了生化危機的實驗室。
因為(被)飛了轉大陸，回港也要簽份「自律書」，今個星期果然有人打俾我：「hi，你有無發燒？」「無。」「多謝你，拜拜。」