最近一位好朋友失戀了，連日嚟嘅折騰令佢精神萎靡，連飯都食唔落。不過都唔知說唔說得上失戀，因為曾經存在嘅戀愛只屬單方面嘅事，又名「當兵」。然而佢比失戀嘅人可憐，因為失戀嘅人有權利傷心，但佢冇。
全世界對失戀嘅人都會顯得份外寬容，對被拒絕嘅兵體卻毫不體諒。一般人大概認為做兵嘅人本係癡心妄想，癩蛤蟆想吃天鵝肉，被對方拒絕根本抵X死。市面上甚至冇單字去陳述呢個狀態。失戀？但從來冇戀過喎。追唔到？都冇明目張膽追過。事敗？又講到好似因姦不遂做壞事咁。
誰得到過願放手，曾精彩過願挽留？慘得過未得到過就要放手，連最精彩嘅畫面都係自己想像出嚟。天下間所有兵都有種幻覺，覺得只要自己肯付出，對方終有一日會被自己嘅誠意打動。的確世上大部分嘅成就都能透過努力達到，愛情卻係例外。試圖用努力令人愛上自己，就有如對住一盆冇落種子嘅泥不斷澆水，以為只要夠堅持就會開花結果，可惜萌芽與否關鍵還是種子。誰不知兩個互有感覺嘅人行埋一齊，剛好下場大雨就事成了。否則日日澆水殷勤獻盡，還是註定失望收場。
當兵嘅人大多係社會嘅中流砥柱，佢哋奉信一分耕耘，一分收穫。假如世上沒有了呢班人材，就業率會下降，經濟自然步向衰退，社會會慢慢崩壞。我哋實在欠精兵們一個公道。無論結果如何，兵嘅付出絕對不比其他戀愛關係虛假。就算得不到男神女神嘅青睞，呢一群還是值得我哋更多嘅尊重同關懷。
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
FB：為何斯德哥爾摩沒有譚仔三哥 by 三家姐 IG：sis3ter