陳南祿
大家會否記得，當年銅鑼灣百德新街、馬天奴咖啡室外面的大茶壺？恒隆地產董事總經理 陳南祿 (Philip)就話當年大茶壺猶如當地icon，如今食街雖然人氣鼎盛，奈何總像欠個焦點、美中不足，所以佢極想可以豎立一個矚目、一如尖沙咀五枝旗杆之類，容易帶起話題的地標。不過，Philip話政府管制公眾地方相當嚴謹，所以費煞思量。Ray就多口話，am730啱啱舉辦賣橋王大賽，參賽者個個都創意爆棚，不如代佢向讀者徵求一下好橋。如果大家有好idea，不妨提議下，雖然無獎，但係如果有一日喺街見到自己嘅意念出現咗，應該幾開心嘅。
另外，國內大腕睇好香港地產利錢豐厚，連番搶灘造新地王，為各地頭蟲帶來不少壓力。Ray第一時間打聽業界動靜，問Philip可有應變之策？豈料他氣定神閒，一派處變不驚。佢話，其實恒隆的商業模式，主要集中在長線收益的項目，已跟一般買地、起樓、推售的不一樣。每年租務收入由10年前大約30億元，增長至現時80億元；雖然集團在國內活躍近30年，但一直貴精不貴多，到目前都只有10個大型項目，低調而穩陣。