長者手機達人
上期提到，有不少窮人每天都在支付「貧窮溢價」，即是以較高的價錢，購買同一種產品或者服務，例如因為冇錢大量購買，買四送一、三件八折等的優惠通通冇份。這情況同樣在不少老人家身上出現，不少長者因為對互聯網或者手機應用的知識貧乏，所以冇得好似後生仔一樣上網格價、攞折扣碼、下載優惠券等等。明明同一件產品，但卻要支付更高的價格。
為了令一班長者更精靈地面對日常生活，政府於去年年底推出了「友智識長者數碼共融計劃」，務求令到老友記們更加識得使用智能電話，與時並進。有時老人家喺電話上篤來篤去，總是做唔到想做的事，如果有人在旁指導會易明好多。有見及此，現時在全港十八區設有「社區支援點」，有專人在場教老友記點樣使用手機及上網。無論老人家想利用手機通訊軟件同仔女或者孫仔孫女溝通、影相拍片、上串流平台睇戲，都可以喺社區支援點學到。如果本身識得上網，呢個計劃亦有提供唔少網上課程，簡單至點樣利用手機使用政府服務好似圖書館同醫健通等，或者可以進階一啲，學習點樣用手機買外賣、到網上超市購物，或者使用網上銀行同點樣用手機俾錢等等。唔太識得上網的長者，亦可以選擇面授課程，主題非常廣泛，由手機理財、電子繪畫以至3D打印都有。課程甚至包括近年好流行的北上消費，例如點樣喺內地用手機軟件訂枱食飯、搵景點、用手機買嘢俾錢、搭高鐵地鐵等。
有時老人家玩手機玩得過度興奮，亦好容易跌入手機或者網上陷阱。因此計劃中亦有不少課程教育長者何謂釣魚攻擊、勒索軟作、騙徒點樣通過手機盜取個人資料同密碼等等，等老友記享受使用手機的樂趣之餘，亦識得提高警惕。
今時今日的手機巳經是我們日常生活的重要工具。手機能夠把長者和家人拉近，我看到有趣的影片也不時會發給阿媽看，孫仔們的相片也經常打爆她的手機。但更重要的是，手機縮短了他們與社會的距離，幫助他們了解身邊事，不被邊緣化。