身邊的朋友對麥兜的故事看得津津有味，是因為某程度上這個「成人童話」很反映現實。跟行家吹水，提起開價這個問題，R先生就大吐苦水：「前日有個女人WhatsApp我，一輪咀咁問我寫嘢同翻譯收幾錢……」這位「心急女士」用機關鎗式口吻(用WhatsApp都感受到她的密集式攻勢，勁！)問R先生收費，R先生很自然地答「唔同性質、是否專門嘢，都會影響收費」，「心急女士」又問所需時間要多久，R先生又答「唔同性質、是否專門嘢，都會影響工作時間……最重要是究竟有幾多頁？」
雙方文字往還一番後，「心急女士」傳上一個擷圖，R先生就問到「是一頁A4的半頁嗎？」這刻「心急女士」沒正面回答，只在不停問「咁你收幾錢一隻字？」有鑒於很難衡量一隻字值多少錢，R先生好客氣地回覆「就當一頁A4有800字，我就會收$XXX。」
這刻「心急女士」竟然會反問「咁如果個客一頁A4多過800字，咁你咪會蝕？」R先生說：「當時我心諗：『到時我咪再議價囉……至多最後咪唔接！』」不過R先生EQ算不俗，最後在兩三分鐘內計出一隻字的「單價」，令「心急女士」好滿意地道：「咁等我覆咗個客先。」(待續)