今年香港迪士尼樂園的超級英雄跑(Marvel 10K Weekend)定於9月16及17日舉行，想跑入香港迪士尼樂園，一家大小一同享受跑步的樂趣，依家個別組別仲有小量名額，報名趁快啦！
迪士尼朋友同Ray講，大會今次仲邀請到多名香港頂尖運動員參加，如單車好手黃金寶、攀石運動員黃嘉欣等，佢哋將主力參加美國隊長10公里跑，期待感受迪士尼與別不同的跑步體驗，享受高壓競賽以外的輕鬆跑步樂趣。Ray覺得可以同本地運動精英同場跑，都幾特別，睇怕到時有好多人會搵佢哋集郵。
先講黃金寶，佢係獲中國香港體育協會暨奧林匹克委員會、香港運動員就業及教育計劃(HKACEP)邀請代表其計劃參加今次比賽，佢話覺得Marvel主題跑步活動題材十分新穎，阿寶同兒子也會一齊睇鐵甲奇俠及其他迪士尼電影，咁依家有機會化身超級英雄同其他健兒們比併，絕對是難得的體驗。佢俾運動初哥嘅貼士係「面對失敗，不要放棄，鬥志和精神方面不可以輸給對手。」
至於黃嘉欣，同樣獲HKACEP邀請代表其計劃參加，佢話自己一直忙於練習，很少機會到迪士尼樂園遊玩，但希望藉著這個比賽支持本地運動賽事和一嘗在樂園跑步的滋味，作為HKACEP一分子，對今次活動十分期待，又話身為攀石運動員，攀石時要高度集中精神，而今次心情比較輕鬆，可以一邊跑步及欣賞園內建設，又可同一眾悉心打扮的健兒們比賽，猶如置身於奇妙童話世界。