【The Mira】一個可以chok住玩的Staycation

好悶呀！冇得去旅行唯有留港消費，但係限聚令成日變，又四人又二人又六點又十點，出行一啲都唔安心，去酒店Staycation算係最穩陣及影響最少嘅活動。一般去酒店玩，不外乎食同瞓，就算有無敵海景，唔通推床去窗邊拍「美景起床照」拍足一日咩，況且我又唔係知性女生又冇閨密，係悶嘅！所以今次我趁假期去The Mira 玩咗一晚。

疫情期間，佢哋將17樓全層改裝成為潮玩空間，有VR game、私人影院、動感飛鏢、電玩天堂(任天堂Switch)、跳舞game同埋其他遊戲房，我當日下晝三點check in，四點開始玩VR game打喪屍，然後喺私人影院睇咗套《天能》，睇完再去其他遊戲室玩，眨下眼就到食飯時間，食完飯再喺房間紅色design chair chok住影相打卡，呢個位夠晒燈光，扮網紅話咁易。休息一晚再食個早餐，再回房間著住白浴袍，手執咖啡杯再chok一會，浸個靚浴再check out，非常之充實好玩，我糧草先行強烈推介俾大家！

介紹返先
VR虛擬實境遊戲有三個Game─ 1.野人戰爭 2.城市守護者 3.生化煉獄，如果你膽量夠，我建議一開始就打生化煉獄，一隻隻喪屍撲埋嚟相當刺激，揸住機槍大開殺戒，玩完我當自己去咗新宿嘅「VR ZONE SHINJUKU」。
私人家庭影院─ 內有四張特大真皮座椅，可以調校角度仲有電暖功能，極致音效系統DEVIALET配合Phantom揚聲，欣賞《天能》(Tenet)最啱Feel，完場一刻好想倒後行返酒店房。