EC職場周記—生日職場抽水攻略(上)
【生日不快樂】
早兩星期曾提及過楚丁有進修的計劃，由於不曾向其他同事披露，這使得有院校致電到公司找趙總查詢時，弄出了一場「楚丁疑似辭職」風波。最後，水落石出，公司上下都十分支持楚丁，無論工作上的安排，以及精神上的支持，都十分齊備。這應該是一個好消息，可是，楚丁近一周又……
畢哥：「楚丁，有間新茶餐廳開咗！一齊落去踩下場，試一試好嗎？」
楚丁：「唔啦！你自己去啦……」
畢哥：「咁唔踩場住，下次先……我哋去返老地方吖……好嗎？」
楚丁：「唔啦！你自己去啦……」
畢哥：「妳帶咗飯？」
楚丁：「無呀！你自己去啦……」
畢哥：「妳有病？」
楚丁：「無呀……你都覺得呀？我唔知呀！我都唔肯定自己有冇病？」
畢哥：「咁大件事？幾時開始㗎？有人蝦妳？……還是……我知道啦！喺咪關於就嚟要返學讀書，所以提早有壓力……之類？」
楚丁：「我諗唔係啦！」
畢哥：「妳一時又話唔知自己喺咪有病……一時又可以話『我諗唔係啦』，咁邊句先喺真呢？」
楚丁：「畢哥，多謝你關心我！有時真喺好羨慕你！咁識得洞察人哋嘅情緒，又咁識得聽出每句嘅細節位……不過，今次我兩句都喺真！」
畢哥：「講多啲嚟聽下，無所謂啱與錯！諗到咪照講囉……」
楚丁：「咁不如落去茶餐廳先講！我唔想阻住你食飯時間……」
畢哥：「好呀！行啦……」
【聖誕節症候群】
畢哥：「點解妳今日由辦公室出嚟……直至依家坐低咗……叫埋嘢食……妳四圍望，一方面要望，但一方面又會縮……妳喺咪爭人錢？」
楚丁：「冇呀畢哥！呢樣真喺冇！你知我出名慳，有錢都唔識洗，點會爭人錢呢？」
畢哥：「據我所知：妳冇感情問題！咁就奇怪啦！唔通『聖誕節症候群』？」
楚丁：「咩嚟㗎？未聽過喎？」
畢哥：「『聖誕節症候群』就即是每逢某啲大節日來臨前，例如聖誕節，有啲人受到節日帶嚟嘅大氣氛所影響，俾四圍撞口撞面嘅裝飾，觸碰到早前嘅不快，所以有咁嘅命名囉！」
楚丁：「咁我諗唔關事啦！因為，喺我嚟講：聖誕節、萬聖節、情人節、復活節……都差唔多！無咩特別！所以我覺得唔關節日嘅事。不過……聽你咁講，諗諗下又好似聖誕節喺比較差啲喎！」
畢哥：「咁聖誕節呢個12月，對妳嚟講，有咩咁特別呢？」
楚丁：「咁我諗到啦！畢哥，我喺12月生日嘅！」
【生日都要攻略？】
畢哥：「吓！邊日？諗諗吓：識咗妳咁多年，從來都無跟妳慶祝生日嘅記憶喎！」
楚丁：「喺呀！我不嬲都好低調！所以……」
畢哥：「生日唔喺咁過㗎，正傻妹嚟嘅！生日喺有攻略㗎，尤其是喺職場裡面！咁即是邊日？妳仲未答我……」
楚丁：「琴日，14號。」
【下期待續】
【周朗與您】其實，昨天是筆者的正日生日，所以有感而發—「拉咗楚丁落水」，但我也有一個心願：
若果您想鼓勵一下小弟，您能否把今期轉發俾5位親友，提醒他們定要點擊閱讀……算是送我今年的一份生日禮物，可以嗎？
當然，感激之餘，我都會預期您追蹤我周五下集的「生日攻略」……
《EC職場周記》角色介紹
本劇主要圍繞4位主角，分別是兩男兩女。
趙達標：總經理。任務導向，人緣方面就……
崔畢源：銷售經理。開朗樂天，講就天下無敵……
歸楚丁：初級文員。任勞任怨，平易近人……
沈碧堅：行政主管。有原則，要求甚高……
相關文章：