英國夏天一到，民眾就湧出來親親陽光。呢排天氣好到不得了，日日陽光普照，唔出街真係對唔住自己啦！剛過去的星期五六日一(26/5至29/5)這個long weekend，在曼城巿中心舉行了The Manchester Flower Festival，慶祝夏天來到，鍾意湊熱鬧的關餅氏當然要去逛下啦！
今個星期一是英國bank holiday，趁花卉節最後一日，與一班新認識的香港朋友相約去這個一年一度的夏日盛會。他們都熱愛踩單車，便踩住兩個轆浩浩蕩蕩出發，而我就跟另一揸車的朋友去。假日的巿中心特別人多車多，搵位泊車好有難度，街位爆晒，去商場Arndale的停車場行了幾層終於有位，但也所餘無幾。都係踩單車去巿中心的朋友明智，比我們還要早到。
Manchester Flower Festival由2018年開始舉辦，今次是第五個年頭，每年都吸引數以萬計的遊客去到市中心參加。花卉節舉辦的範圍包括Arndale、Exchange Square、New Cathedral Street、St Ann's Square及King Street，在這裏的商舖、街道、櫥窗等都以花卉作粉飾，而花卉節的重點是設有一條Floral Trail，跟着大會提供的地圖，可到多個由花卉與園藝達人打造的藝術裝置打卡，還有賣花賣盆栽賣食物雪糕啤酒的攤檔，成條街人來人往，餐廳酒吧的露天座位坐滿人食嘢飲酒吹水曬太陽，熱鬧如節慶巿集。當日氣氛非常之好，陽光下大家都展現燦爛笑容，又開心了一日。