新正頭，祝大家兔氣揚眉，動如脫兔，兔年行大運！適逢年三十、大年初一是星期六、日，不用返工返學，有兩家朋友分別從Southport和Aylesbury來曼城探訪，可以成班朋友一齊食盆菜、行年宵、睇舞獅，今年在英國過農曆新年，氣氛顯得特別熱鬧。
以往在香港過年，關餅氏都會與家人食盆菜，酒店、酒樓、快餐店選擇多的是，買又方便！在英國想食盆菜，出街買當然冇乜選擇，又是香港人技能解鎖的機會來了，那就不如自己動手做吧！正所謂人多好辦事，年三十晚團年飯，集合眾媽媽之力，兩盆有鮑魚、大蝦、大花菇、炆豬腩肉、咖喱魚蛋豬皮、雞鴨燒肉等豐富材料的「家肥屋潤愛心盆菜」大功告成！雖然要煮煮切切砌砌好花時間，但一齊合力做好一件事，是特別開心滿足。飯後不但有甜品，更有街坊送來手寫揮春，大家都搶住要，好意頭嘛！
今年英國年宵巿場特別多，倫敦、Bristol、Nottingham等大約十個城市都有，而曼城當然唔少得，大年初一，我們一班街坊好友便去逛逛湊熱鬧。年宵巿場在一個社區中心舉行，場內人頭湧湧，40個攤檔有賣熟食有賣乾貨。為食的我最想食到香港街頭小食，之前宣傳話有魚肉燒賣咖喱魚蛋碗仔翅，但當日去到已售罄。不用失望，還有很多美食，龍鬚糖、日式磯煮鮑魚、日式手卷、泰式海南雞飯、韓式炸雞、老婆餅、鳳梨酥、十勝紅豆年糕等等，款式多到數唔晒！更有攤檔免費派發MIRROR應援品，我阿女見到即時雙眼發光排隊攞到Anson Lo同姜濤postcard。行完年宵，大家仍興致勃勃直落去太湖酒樓飲茶，咁啱下層的中式超巿永興隆有舞獅表演，又打鑼又打鼓，吸引大人小朋友齊齊圍觀很熱鬧。在英國，農曆新年沒有氣氛？今年一啲都唔覺得！