Vetements 2021秋冬靈感來自藍色水的系列。
Vetements 2021秋冬新季作品靈感來自「在地獄生活中的我們」，當中有政治表態扮Bernie Sanders的slogan tee，其中藍色潑墨效果衫裙，如果唔係品牌CEO Guram Gvasalia(即係Balenciaga創意總監Demna Gvasalia的細佬)煞有介事向《Vogue Runway》話，靈感來自香港警察出動藍色水嘅水炮車射向示威者，不要說是香港，就算全球時裝界都應該會冇乜人理。
用過氣潮牌來形容Vetements不算mean了，2017年品牌來香港開限定快閃，那批DHL風褸T恤唔算太賣得，之後品牌「呼風喚hype」的能力一年衰過一年，到2019年Demna就宣布離開自己創立的品牌，俾晒佢阿哥打骰。當時Demna話覺得自己已經完成創新者的使命，可以功成身退，計我話其實已經聞到「𤓓味」，接著更被潮網Highsnobiety報道品牌積存太多舊貨要割價求售，至此品牌不要說hype，簡直愈來愈頹。
全個系列有156個look，都唔知做咁多衫出嚟做乜，有好多都是重複前人的idea，抄襲成軍，這款靈感擺明來自Martin Margiela 97秋冬經典的Stockman系列。
Martin Margiela 97秋冬Stockman
呢幾套Vetements 2021秋冬，全部都是想從「罵治」那裡偷師借屍還魂，抄考都搵個新對象吖，佢厭唔厭嘅唧。
時裝糾察Diet_Prada，都出文嘲Vetements抽水。
來季取材正因為涉及香港抗爭運動，連遠在美國的Diet_Prada都覺得品牌是消費反抗力量，香港這邊黃絲陣營更加反應大，估唔到官方喉舌某報都好似執到寶一樣，拿來大書特書一番。一篇「Vetements賣暴動衫 」的文章，前一句「暴動」，後一句「暴民」，可謂緊跟黨路線，但內文有點古怪，引用「佬訊」全句quote不特止(「諗起當仲有好多人坐緊監時，第時可能有班rich kids著住件衫周圍走，又有班人喺背後數緊錢，我有啲作嘔。」)，連登網民熱烈討論又照登如儀，全篇文章六段，當中四段都是黃絲看法，除咗條標題party line跟得好足之外，話係蘋果文都有人信，哈。