上個星期滴滴出行吞併埋Urber中國，至此滴滴幾已一統天下，呢單買令到滴滴估值達到350億美金，港紙嚟計係2800億，滴滴由成立到今天只不過係4年，竟然可以打造成為接近3千億市值公司，互聯網世界，真係有乜唔可能。
人生有一啲決定，確實好奇妙，其實講到打車軟件，快的仲早過滴滴喺市場推出，之後滴滴先加入戰場。快的創辦人陳偉星原本搞網上遊戲起家，當年喺小區打唔到車，於是諗起搞快的，跟公司同事講，所有同事反對，最終佢拉咗十二個同事入局，好多老不大願意，明明搞遊戲好好，點解要我搞檔咁冒險生意。
快的員工後悔走得早
就在快的將推出前，啲唔滿意嘅同事陸續離開，陳偉星死命拉住個搞技術嘅同事，又氹又呃咁先將佢留住。嗰時陳偉星諗，往後俾返十個八個巴仙股份佢，作為鼓勵又好，作為補償都好，點知推出兩三個月後，連呢位同事都唔睇好離開，陳偉星原本諗住送股都慳番。
之後點發展，唔使講大家都知，打車軟件雖然仍不賺錢，但不斷併購，不斷融資，估值愈做愈大，到舊年先與滴滴合併，而上周收購埋中國Uber，以呢個估值計，若然嗰位快的開國功臣攞咗啲股份，到今天經過幾輸融資而攤薄，但即使係得1%，都已經接近30億，你話佢後唔後悔。
另一件事剛好相反，當年優衣庫(Uniqlo)老細枊井正仲幫緊老竇經營一檔裁縫生意時，要將老業務改革，叫咗裁縫店6個員工出嚟商量，結果一聽太子爺個意見，個個覺得唔掂，最後又好似快的班員工咁，走吓一個走吓一個，淨低一位叫做浦利治仲肯跟佢；結果點？當枊井正做咗日本首富，浦利治亦成為優衣庫常務監察董事，係集團第五號人物。
Match Point
又好似萬科原始股東劉元生，萬科1988年喺深圳上市，由於有外資企業股東臨時縮沙，搞到王石唔知點算，搵咗香港老友劉元生捱義氣，拎360萬頂咗間外資個份股，結果點？真係想都未想過，劉元生持有到今日，竟然價值超過30億。
人生喺好多事情上係控制唔到，一個決定會改變你一生，好似活地阿倫套電影Match Point以打網球做譬喻，球來球往時，一球貼住個網，好運就跌去對手嗰邊，唔好彩就跌落網輸咗，我諗嗰時浦利治或者劉元生，發夢都諗唔到會成為日本最大成衣集團，又或一個投資竟然令佢十世無憂。不過咁，都係嗰句，運氣嘅嘢雖然要有，但唔好因為咁而乜都唔做等運到，都要努力㗎！