強如中國鋁業，毛利率都只得單位數，若然有民企是超高，就要小心。【資料圖片】
「十家民企，九間做假」，雖然講得有點誇張，但睇見近期連嗰啲市場以為好正嘅民企都被攻擊，再睇睇沽空機構理據，被狙擊嘅企業回應，又好似唔係無的放矢，作為小股民，真係唔知信邊位？
過去幾年，內地企業喺香港上市，股價能夠拾級而上的公司寥寥可數，幾咁艱難先搵到明星股，例如瑞星（2018）、科通芯城（0400）、敏華（1999）等、點知都先後被沽空機提出質疑，股民往往被殺個措手不及。
提防超高毛利率公司
要避開呢類公司，又冇能力深入調研，我建議用一招就可以，就係睇佢毛利率；若然係超高，特別唔知點解可以大幅拋離競爭對手，咁就要小心。好似輝山（6863），毛利率高到56%，但啲大型乳品公司都係做緊30幾；又好似做鋁間宏橋（1378），毛利率貼近3成，但強如中國鋁業（2600），毛利率都係得單位數咋！
點解佢哋做得咁高毛利率？沽空機構踢爆，話供應商幕後老闆根本就係上市公司大股東，平價供應俾上市公司，供應商雖有損失，但做高毛利率可以整靚上市公司盤數，股價隨之上升，大股東咪可以喺股市賺返囉。
過往有啲公司，會話自己擁有超高科技，毛利率高過人一啲唔出奇；再唔係有啲會話我吔係為客戶Tailor-Made（度身訂造）㗎，所以毛利率高係理所當然。我可以咁講，大部份都係「昆」你嘅。
邊有咁易搵到第二隻騰訊
你可能會話，唔能夠抹殺有啲企業真係做得好，攞到高毛利率喎？冇錯，市場肯定有企業做得好，但作為普通股民，冇會計師或分析員嘅功力去拆解古惑；又唔係基金經理，能夠見管理層嘅機會鳳毛麟角；更唔多懂大陸市場運作，況且啲公司遠在內地，唔容易實地考察。所以即使有一間半間可以跑贏，但考慮到中伏機會咁高，有時走失咗機會都算喇。
既然好嘅公司十分有限，倒不如咁諗，買少隻算喇，自問邊有咁好彩買得中，最終選擇少沾手為妙，或者只係跟炒一輪，搵到著數就算，千萬別以為可以搵到第二隻騰訊（0700）。總之都係嗰句，有懷疑，揸現金。