股市造好產生不少「股神」。(資料圖片)
睇報章財經版開始感受到歌舞昇平的氣氛，不少專欄作家都開始唱好大市，報道內容都係正面，離不開騰訊控股(700)、滙豐控股(005)破頂之類，「大時代2.0」的講法不脛而走。連身邊一些寫樓市、做數據分析的專欄朋友，都跟著唱好。
所謂執輸行頭慘過敗家，連我這些賭大不賭細的賭徒，也沉不住氣買了幾十萬港交所(388)call輪。這就好比一個專業德州撲克選手，連fold幾十手牌，無啦啦斜眼見到隔籬枱將百家樂路紙「好路」，然後去跟風盲賭。我沒有甚麼可以侃侃而談的高深見解，純賭純投機，唯有祝我自己好運。
分析員對大市可能有很多見解，有無數的indicator去支持自己的觀點，例如睇美匯指數去推測資金流向，睇外圍走勢跟風，也有參考歷史恒生指數市盈率，去判斷升跌等等。
這些套路唔難掌握，都係花拳繡腿，大學都有得教，YouTube亦有得學。經濟學的概念外，仲可以用埋simulation等計量工具，愈搞愈複雜。只是我經常強調宏觀大市有太多變數，變數之間的影響力又是動態隨機地變化。太多變量和太多隨機性，會引致分析模型準確性出現極限。
以前睇書睇到金融海嘯的部分，總會強調過往研究員通用動態隨機一般均衡模型(Dynamic Stochastic General Equilibrium Model)去做宏觀分析和預測，但海嘯後，大家發現模型的極限，開始帶有懷疑和批判的態度。以我認識的一般專業投資者朋友，係無人會搞到成件事咁複雜去計。都是成功效益問題，複雜的模型要時間去設計和運算，成本也是考慮，若準確程度都是一般，那不如放棄搞大件事好過。
最簡單用番生活智慧去睇，往往都係最真實和最貼地，而且成本效益最低。張五常的理論也強調要貼近生活，不論他賣桔講價格分歧，還是睇畫講上河定律，都係以微觀人類行為的觀察為主。像股神巴菲特、Peter Lynch等亦強調生活中選股票，甚至經典的「擦鞋童講股」，也是相反理論在生活上的應用。
老外有一套觀察模式，香港都有。香港係盛產少年股神的神秘地方，每隔一段時間，此等妖物總會在媒體上曝光，成為媒體追捧的對象，暫時的經驗係百分百中，妖物一出，三個月至半年內個市總會見頂玩完。
所以道理簡單，如果發現學生哥、師奶兵團等出現股神，那就是見頂之兆。尤幸，此等魔物仲未出現，股市理應仲有一段升勢。少年股神，真係判斷香港股市最地道、最精準的indicator。