1.0 頭耷耷時代
2.0 膽粗粗時代
3.0 嘴gel gel時代
社會的未來，取決於年輕人的質素。(資料圖片)
上周與幾位中年朋友聊天，內容提及依家嘅年輕人，佢哋都不約而同地批評年輕人種種不是，認為「一蟹不如一蟹」。但我唔係咁睇，我覺得年輕人並非一無是處，只係時代不同，質素有所改變而已，因而呈現出來嘅思想和行為，未能令到上一代人滿意。
回想幾十年前，我稱之為企管1.0時代——頭耷耷時代。當時嘅年輕人比較純樸，受教育嘅方法亦較簡單，所以有點傻頭傻腦。而社會風氣崇尚誠實、樸素，對稍為滑頭嘅年輕人深深不滿。所以，年輕人大多頭耷耷、奉公守法、服從權威，表現誠懇真摯。不過，佢哋仍然被批評為「一蟹不如一蟹」。
到咗八十年代後，就進入企管2.0時代——膽粗粗時代，年輕人普遍接受了高深教育，亦了解世界形勢，可說是民智漸趨成熟。當年多咗年輕人出嚟創業，並提出咗好多創新意念，為香港發展打好基礎，經濟屢創高峰，深獲國際認同及稱譽，成績有目共睹。不過，佢哋仍然被批評為「一蟹不如一蟹」，確實令人費解。
但近十幾年進入咗企管3.0時代——嘴gel gel時代，年輕人喜歡喺社交平台發表意見，更懂得喺網上討論事情，知無不言、言無不盡，乜都敢講，就算唔係好熟悉嘅話題都參與討論，誓要語不驚人死不休，成為一種新嘅發表及分享文化。唔少大人睇見咁，就覺得呢班後生仔唔成熟，仲好幼稚，竟然可以談論天下大事，心中感到酸溜溜。
我哋不得不承認，現代科技及社會潮流容許年輕人進入呢種看似不切實際，但實際上又作用無窮嘅奇妙境界。現在社會競爭激烈，難道我哋仲要求年輕人頭耷耷嗎？當然不是。就算膽粗粗亦無可能創出新天地，一定係要有前無古人嘅創意，再加上擅用科技，以及發動大眾支持，先至有望成功。就算如此，年輕人仍然被評為「一蟹不如一蟹」。
成年人總喜歡批評年輕人，慣常用語就係「一蟹不如一蟹」，總係覺得自己最好、自己突破、自己成功，年輕人只係幼稚、平凡、離經背道。但我身為大人，點解唔認同朋友嘅講法？原因係佢哋罔顧事實，點都唔承認年輕人有佢哋嘅天地及想法，而呢啲正正就係支撐社會發展嘅關鍵因素。
大人睇唔過眼係一回事，社會形勢發展又係另一回事。社會發展速度之快，超乎想像，而社會嘅未來，亦取決於年輕人嘅質素。如果我哋只懂批評，只會拖住佢哋後腿；如果覺得佢哋唔夠班，應該出手相助，而唔係冷眼旁觀，不斷埋怨。
馬雲經常說：年輕人就係社會嘅未來。所以，佢鼓勵年輕人要經歷好一生，哪怕創業九死一生，但未創過業就浪費一生。
好希望各位大人多啲為年輕人著想，幫下佢哋，鼓勵佢哋，讓佢哋喺當今社會好好發展自己。
Paul sir話齋：頭耷耷者不合時宜，膽粗粗者亦漸過時，嘴gel gel者充滿創意，追上形勢時代寵兒。
作者為企業管理顧問有限公司首席顧問，曾任餐飲集團行政總裁及現為顧問，中年失明後活出一條新路，著有多本企業管理書籍。Facebook專頁：企管3.0時代-Paul Sir
逢周三見報