「95後」今年第二季人均拖欠卡數金額約1.42萬元。(資料圖片)
個人信貸評級機構環聯公布數據，顯示95後拖欠卡數人數約為3,094人，按年上升45%，他們的逾期還款亦按年增加約52%，至4,400萬元。人均拖欠金額由去年第二季約1.35萬元，上升至今年第二季約1.42萬元。然後，數據被演繹成過度消費，這班95後年輕人又成為被批鬥的對象。
身為非95後的90後，比起一面倒批評年輕朋友過度消費，我想更立體去解釋他們的消費行為。
美國經濟學家佛利民曾經提出恆常所得假說(Permanent income Hypothesis)。他指出，暫時性的收入改變，對消費支出行為只會有很小的影響，但是永久收入的改變，對消費支出行為則會有很大的影響。通俗來講，即係一個人搵幾多使幾多係整定嘅，長期來說，短期嘅消費行為模式就靠利率嘅高低決定，利率可以好多，可以係貼現窗率、可以係債券風險無風險利率，這兒講嘅利率係經濟學常用嘅利率概念。
利息嘅出現通常有兩個動機，第一個就係impatience to consume，另一個係opportunities to invest。喺一個低息環境嘅情況下，年輕人以較低嘅成本及時行樂，係一個理性嘅行為，因為佢哋長遠嘅消費行為，係由長期嘅預期工資所決定。
依家年輕人欠下嘅卡數都係約1.4萬元，一般大學生嘅月均工資都係差唔多呢一個數，如果你做紥鐵藍領，分分鐘收入更高。以往低息環境係鼓勵咗消費，同一時間亦都鼓勵咗資產主義，亦即係以低息換取資產膨脹嘅財富效應。
香港人過往幾年有一套信仰價值，就係透過買樓去致富，依家低息環境逆轉，利率正常化，玩法又唔同咗。這班95後及時行樂，平均欠卡數都係講緊幾萬蚊；你依家衝出去買樓，借錢按揭，用埋老竇老母錢，呢度講緊嘅都唔知係幾多個百萬元。呢一種買物業嘅行為，係將自己一生人嘅收入同埋父母半世人嘅收入押上，承擔嘅風險比起年輕人嘅卡數多唔知幾多倍。到底邊個唔理性，真係交俾讀者去判斷。當我哋用同一把尺去批鬥年輕人嘅時候，都要留意吓其實自己做緊嘅行為，係比年輕人做緊嘅更大風險。
消費嘅本質唔一定係邪惡，更加可以係推動經濟嘅重要動力。日本新一代無慾無求，過住佛系生活，大前研一叫呢個現象做低慾望社會。有一派人係覺得消費不足，令到日本經濟大不如前。呢一種講法同香港批鬥年輕人嘅講法可謂互相輝映，非常有趣。
說到底，即使老海鮮如何罵他們都不痛不癢，因為他們都是在Facebook和傳統媒體上大放厥詞。這班新一代年輕人，都不玩Facebook了，更何況傳統媒體平台。