現代教育個一擲萬金挖角廣告，補習天王身價幾近一億，全城即時嘩然。事緣現代教育競爭對手遵理正搞上市，現代教育突然出招，殺對手一個措手不及，確實高招。
現代教育喺報紙登廣告，講到明話以年薪八千五百萬(若達到某個學生數量)挖遵理王牌教師林溢恩過檔，仲懶有誠意話林一旦加入，馬上俾三千萬誠意金；但Loser可以話，現代教育根本冇諗住會請林溢恩，林亦深明此理，於是喺Facebook發表聲明，話：「當仁不讓，不亢不卑」，贏到一片掌聲，真係聰明仔，抵佢年薪過千萬。
孫子兵法中的一招係攻其無備，現代教育借呢則廣告，俾大眾知道遵理每年盈利中有4成來自林溢恩，按招股書資料，遵理去年盈利三千幾萬，林溢恩為集團帶嚟千幾萬。當你睇完呢度，你會點諗？若我係股民，會想到：「哦，整家公司有好大部分盈利靠林溢恩，若佢唔撈，集團盈利即時大跌，而佢明年約滿，換言之遵理未來盈利收益好唔穩定。」
即使林溢恩已表明心跡，但到明年續約，你係佢你會點？唔好同我講佢對教育好有熱誠，若然真係佢唔會做補習天王。正確情景大概係佢會跟老闆伍經衡講：「喂！阿Ken Sir(現代教育創辦人)嗰邊都俾八千五萬年薪我喎，Richard(伍經衡個英文名)，我都好想留喺度，但人哋都幾有誠意。」
咁伍生都唔能夠話「教育係作育英材，我哋有社會使命」呢啲廢話去敷衍林仔(事關伍生周身LV，一睇就知佢視教育為一盤生意)，佢都要實際行動去俾高啲人工，咁樣集團成本又高唔少，若你係投資者，買股前時都會諗清楚。
只要股民會諗，有猶疑，正正就係現代教育目的，你話佢真係俾近億去請林仔，相信我係香港教育(現代教育母公司)股東，我會馬上沽貨。好簡單，現代教育上年盈利都係三千二百萬，請一個林溢恩，即使對方可以帶唔少生意過嚟，但計落條數全年業績隨時蝕本或大跌，以Ken Sir咁精明，又點會諗唔到。況且用咁高薪請條「口靚」仔，其它現代教育啲補習天王又會點諗，肯定影響軍心，產生嫉妒。
現時最高招，兵不血刃就可以俾咗好多麻煩同壓力遵理，一方面等你上市集資唔容易；又留條尾巴，令你個王牌戰將隨時有離心，現代教育呢招有幾醒，大家諗吓就恍然大悟。計我話，現代教育咁叻，唔應該淨係做學生生意，應該開多科，就係商業戰略，相信唔少商場中人願意報讀，學費仲可以貴好多呀。