市況唔好，多咗公司私有化，面對私有化，許多時小股東會話；「邊有咁好死呀，大股東私有化肯定有後著，唔係點會出個高價俾我哋。」於是乎有啲股東死唔肯賣，寧願同大股東鬥長命。
坦白講，大股東梗係有好多考量先會私有化，但大股東係咪有著數唔係最重要，股民要從自身利益出發，關鍵應睇賣俾大股東係咪對自己最有利，繼續持有又會點。
富貴生命溢價私有化
以上個禮拜隻做殯儀生意嘅公司富貴生命（1438）為例子，私募基金CVC要將佢私有化，每股出價3蚊，與年幾前上市價相若，但較富貴生命過去半年平均成交價高出三成幾；喺今日咁動盪市場，經濟前景唔理想，怕且股市都唔易玩，有機會向下再插，咁不如以較高溢價套現離場，手持現金再等機會著數。
再講，若然私有化唔成功，股價肯定會跌返落去，幾時先可以上返個收購價，真係冇人知，或者若干年後可以，甚至升得更多，但呢啲都係未知數，無謂去鬥氣，時間都係金錢，機會成本都要考慮。
股市不穩 現金為王
有一點小股東都要留意，呢間公司嘅市場認受性較低，事關佢業務喺馬來西亞同新加坡，本地投資者唔多注意，相反同類業務嘅福壽園（1448），業務喺中國，就深受投資市場歡迎，畢竟中國人口多，經濟強，啲人願意喺殯葬花費。可以咁講，繼續揸落去，可能要鬥長命，始終馬拉又點會有中國咁大個市場，投資者係買都買隻十三億人口嘅殯儀股。
講到尾，小股東最重要睇個出價係咪合理，雖然小部份當初買入嘅股東只能打和走人，但考慮到呢兩年好多股份跌咗唔少價，平手離場都唔算蝕，至於其它股東，有好價仲唔賣咩，𠲖家市況，Cash is King呀！