香港寬頻行政總裁楊主光(左)和營運總裁黎汝傑。(資料圖片)
「昨日，我菲律賓工人行過街市聽到有個賣魚佬講話有條友仔叫做賭神，係你。哈哈……我當堂嚇咗一跳，然後得啖笑。呢個世界，居然有人自稱為賭神，咁即係分明當我流唧！」這段電影《賭俠》對白，配合一位低胸性工作者鏡頭食公仔麵，講述周星馳send錄影帶向劉德華自薦，係香港八十、九十後的共同回憶。講起上來，現在的八十、九十後都已經成為職場一分子，甚至打滾幾年。
香港寬頻(1310)COO黎生向2,700名應徵者出公開信，以高高在上的心態，勉勵應徵朋友要跳出框架，要「Wow」到公司，熟讀公司資料等等。專欄朋友的睇法幾兩極，千頌C覺得很正面，中環十一少則偏負面一些，覺得這等同叫應徵者做Free Pitching，如同獲取免費顧問。如果自薦要「WOW」，相信無人「WOW」過賭俠周星馳，不過，周星馳的自薦是失敗的，要不是咁啱撞正侯賽因派殺手，一起度過生死患難，星仔是進入不到刀仔的世界。
第一眼睇到香港寬頻的公開信，感覺是英文很港式。當然我英文也非常不濟，只好請教前大律師、現在教英文IELTS的林作，他覺得語句太「中式」，也有小量語法問題，例如conditional sentence的用法不對。我識條鐵咩，想知自己搵佢留意番吧。
客觀講，見工要熟讀資料，這是基本尊重，正如我見客之前都慣性會起一起底，做簡單的due diligence，保障自己嘛。我比較輕視的HR商業理論，如Theory X and Theory Y會從人性、動機出發去睇到底應徵者的性格特性，公司文化等。先睇吓香港寬頻請甚麼人，那個崗位叫「Summer Innovator and Marketing & Finance Trainee」，應該是初級職位，當然大眾認識「Marketing & Finance」，但「Innovator」卻不知是甚麼職位了。香港寬頻的business model不是像《100毛》做創新，跟他們有淵源的王維基先生講過寬頻生意是定期收錢本質，如果我要「WOW」，也「WOW」《100毛》或6年前的香港電視(1137)啦，「WOW」一間沉穩、殷實的商業機構做乜。
應徵過程是雙向，「WOW」是一種策略，在博弈角度，傻仔同叻仔都是一線之差。好像香港寬頻這麼大的公司，HR部門請咁多人，就係要由HR部門去做配對、篩選，搵一個合適的人。就算我想「WOW」，未見到管理層只怕已經被人當傻仔篩走啦，你叫人「WOW」的前提，起碼自己都要project一個夠「WOW」商業image先，但公眾又唔覺喎，連公開信都唔夠「WOW」，憑咩叫人「WOW」？
除非COO黎生是跳過HR，親力親為睇晒2,700封應徵信等人「WOW」，否則講乜都無用，HR關卡一定過唔到。調翻轉講，一間公司管理層竟然花時間睇晒2,700封初級職位的應徵資料等人「WOW」，咁佢一定犧牲很大機會成本，把心力都用在初級職位應徵上，這間公司還能有甚麼前途和發展空間？