鷹式足球，初次登場，俯瞰現今千變萬化嘅足球生態，期望跟讀友靈感衝擊。英超千變萬化，真係好睇。新敗嘅車仔嚟個大輪換，賽前是非不絕；比賽形勢處下風，仍能爆冷擊倒熱刺。干地排陣，膽識過人領大功，搵大衛雷斯推上中場，兩隻「跑狗」防中傍實，排陣大執位下，靠左翼衛入兩粒，贏得精彩。
又再回看，阿仙奴嘅雲爺爺，揭幕戰贏李城4比3，防線已危危乎；剛戰敗走史篤城，串演中堅嘅蒙利爾又走甩對方箭頭失波；戰術例牌下半場中段，才施施然換入基奧特搏殺，不過今次衝唔散對手防線。阿仙奴對上一次聯賽開季連捷，要數番2009至10年球季，難怪唔少廠迷長期抑鬱。
講番今、明兩晚，有13支英超球隊亮相「無謂」嘅英聯賽盃第二圈。說無謂，除獎金少，上屆冠軍僅得10萬鎊之外，對上3屆冠、亞軍，全部係受惠出席歐洲賽，在本輪得以輪空一族。即係今周出場嘅英超隊，早晚做炮灰。保住英超命要緊，冇心跟你糾纏正常。西布朗開季連贏兩場1比0，但其實一向唔重視呢個盃仔；對上3季呢一圈90分鐘內都贏唔到低組別對手，今晚作客到英乙前列嘅阿克寧頓，聞到有啲冷味。