非洲兵快回來

足球場上，每當有重大爭議判決出現，陰謀論假波聲音就會炒熱。戲碼強如今屆非國盃決賽，完場前亂到摩洛哥嘅皇馬前鋒巴謙戴亞斯，喺鳴笛前嘅12碼竟然夠膽用Panenka呢種輕佻方式主射，被對方門將接實個波，主隊最終無法圓幾十年嘅封王夢。究竟佢係出於道義，唔想勝出不義之戰定真心膠，呢個謎同98世盃大哨突然失準，巴西慘敗一樣可能永遠無法解密。

非洲足球新星嘅寶藏其實早被西歐大會掏空，國家隊在世界舞台更難有驚喜，非國盃亦係亂中結束。就算今夏世盃會有多達9或10個非洲代表，睇怕佢哋爭勝最強本錢都係到時嘅炎熱天氣。今屆非國盃賽前被指最強新星嘅塞內加爾17歲前鋒伊巴謙麥巴耶，出生法國早被PSG相中踢緊一隊後備，去年尾先「棄法投塞」，但今屆非國盃冇踢過一場正選入得1球，潛力都係留返喺大巴黎爆發。一眾大球會只係期望大牌非洲球星回歸報平安，下半季為真米飯班主拼搏。

曼聯兩大非洲兵回歸即勝出打吡戰，利物浦需要沙拿，曼城等緊另一埃及射手奧馬馬莫殊。