古列治睇波

八、九十年代頂級球星之一，必有一把長髮嘅荷蘭人古列治，好波又有型；可惜跟其他荷蘭猛將無法合力贏得世盃殊榮，留憾告別一代盛世。歐洲3大盃賽，如今荷甲只剩阿爾克馬爾喺歐協聯16強角逐，最強荷蘭教頭、利物浦嘅史洛係下一位被炒英超領隊嘅熱門之一；半退休狀態嘅古列治睇完英超「阿車戰」覺得足球比賽已變垃圾，發晦氣以後唔再睇波，心情可以理解。

世界進步足球向前，我也永遠懷念1988年歐國盃嘅雲巴士頓射爆蘇聯。英超獨步球壇有佢魅力，埋身肉搏足球只係其中一種伎倆。只見包尾狼隊近4仗聯賽3鬥前列球隊搶得7分，上輪英超Big Six只得3隊五成贏波比率，可見英超空前激烈；領隊要追分保烏紗，更冇可能好似古列治當年做車仔球員兼領隊捧到英足盃咁巴閉。英超圍內悶蛋，但踢歐戰會因應對手防守偏弱進取；如今六強正好分列歐聯四線爭霸，其中3隊先鬥西甲三雄，正正可以俾古列治回心轉意，睇佢點名最好波嘅巴塞球星拉明耶馬，可否以一人之力摧毀英超中下游嘅紐卡素。