「干兩招」無用

球星腰纏萬貫，敬業樂業唔係必然。麥總經歷咁大打擊，啱啱喺PSG要1個頂3個，輸場法甲好閒但值得致敬；喺水平更高嘅英超，仲要即出場踢3輪快車嘅球員，更值得拍爛手掌，冇得挑剔。好似熱刺咁，波士干地一向擅長鼓起眾將戰意，要求球員付出百分之二百體力，跟對手周旋；而且呢位冠軍級教練一向少輪換，陣上戰術唔算靈活多變，熱刺復賽踢兩輪英超不勝，係Big Six中最差。

只見干地愛將格仔老兵翼鋒佩利錫、哈利卡尼同老孫，已連踢2場正選；法國鋼門洛里斯同阿根廷中堅羅美路，踢完世盃決賽大約兩個禮拜，啱啱要主場坐鎮，但照輸中下游分子維拉，洛里斯仲要彈琵琶，可能仲諗住中東個太陽掁眼。熱刺明晚作客神經刀水晶宮，之後月中鬥阿仙奴同曼城；干地現時係繼莫耶斯同林柏特之後，下一位英超被炒領隊第3熱門，輸波慣性兩招：同班主講要買人、有心理準備今屆踢唔到佳績呢類口術，不如諗下點樣輪換一啲有氣有力嘅新人、改變戰術，俾主力休息下。保守嘅干地，有咁嘅吉士嗎？