香港街馬今年參賽人數明顯少咗，走個32.195公里大半馬，幾乎未見塞人出現，氣氛雖較前平淡，但每個人都可以舒服按想要嘅配速完賽，天氣又清爽。除咗首次殺入東隧嗰2K幾通風不足，好似向緊個焗爐上斜，又晨咁早要5點多起步，但由出發時披星戴月，到睇住日出而跑，呢種經驗喺每年香港路賽唔多有。街馬好多人只當係fun race，完成時間唔會太在意，但作為約4星期後「正菜」嘅渣馬，卻係一次好好嘅長課。畢竟兩條賽道愈嚟愈似，渣馬全馬尾段嘅西隧一向更「攞命」，但今年賽前先有個咁好嘅經驗，跑手嚟緊如有機會做多幾次長課儲里數，再捱得過農曆新年期間嘅美食誘惑同減少應酬，目標成績應仲有上調空間。
街馬一直求變，未來會博成功辦到全馬42.195公里；唯一不變嘅係仲係大部分組別冠軍，攞到嗰張哭笑不得嘅單人來回埃塞俄比亞經濟艙機票。去當地喺咪可以吸收天地靈氣，返嚟跑到更多PB就不得而知，但要攞到假期獨自上路嘅決心，不比博首名衝線細。