睇國際足球大賽期待超新星彈起，或者各隊王牌球員領軍盡地一煲。上屆世盃嘅「美斯騷」，過程峰迴路轉，成就一齣好戲；相反世界各地精英早已盡在西歐聯賽，無秘密武器可言，所以善教「小牛」嘅西班牙主帥拿富安迪首戰大膽用16歲嘅耶馬爾踢正選右翼，破歐國盃最年輕出場紀錄，外界反應唔算好大，只因呢位巴塞神童，單喺上屆西甲已出場37次。歐國盃未到戲肉，先留意一批老將嘅演出更珍貴，睇得一場得一場。
今屆歐國盃「三大長老」，38歲嘅克羅地亞莫迪歷，上仗賽後被評該隊最低分。老過佢嘅葡軍孖寶41歲比比同39歲C朗，今晚鬥捷克好有機會出場。C朗2012年歐國盃當紅仲入選最佳陣容。12年後，難得主帥馬天尼斯上任仍然重用呢位沙特兵，佢落得場必盡力顯示自己依然可以係歐洲萬人迷；而且只見三獅保守成性，又等淘汰賽現真身、橙軍首場露晒底，過去三劍俠喺歐國盃嘅光輝歲月難再，相反葡軍分組賽抽籤有利，只要得各師弟全力拱照，C朗分組賽入4、5球一啲唔出奇。
