出租英超大叔
今季英超打咗接近四分之一賽程，根據網站transfermarket.co.uk統計，今屆有13隊曾以外借兵出場；最重視佢哋係「呻窮」嘅愛華頓，共4人出場20次平均上陣52分鐘，其中積夏里遜同奧利爾文加拉都係隊中主力，「拖肥」為求自保走短線，策略正確。
今季最貴人工嘅外借兵，應該係由車路士過檔阿仙奴嘅史達寧，32萬5千鎊周薪，兩間倫敦大會一人出一半人工，阿仙奴以為執筍貨。可惜英格蘭著名翼鋒走下坡速度一向特快，「一億先生」基亞利殊喺曼城越踢越沉，只係獨沽一味左邊死扭出波，今屆聯賽食白果，佢好彩仲有大樹好遮蔭。另一位29歲、1米72(阿仙奴一隊最矮之一)嘅翼鋒史達寧，走到平均年齡輕、高佬多嘅阿仙奴，淪為「出租英超大叔」特別礙眼；今屆喺英超上陣4次，入波、助攻欠奉，反而上圈英聯盃1入球1助攻，係佢表演嘅大舞台。不過英聯盃冠軍獎金奀到得10萬鎊，唔夠史達寧周薪嘅三分之一，明晚阿仙奴只會半力出擊作客英冠普雷斯頓，史達寧今屆做主角機會仲有幾多次？