失星的年代

歐美兩大盃賽，嚟到關鍵時刻仍然悶戰連場。今晚起兩盃4強戰共4場波，3場牌面係五五波，一場係強弱懸殊嘅世盃冠軍鬥下屆世盃主辦國之一嘅大賽初哥，如果好睇，就算係深夜3點同早上8點嘅趕客時段開波，球迷唔會容易錯過；可惜保守同整體足球橫行嘅年代，球王同新星同時「失蹤」、部分大牌攰爆等放假，期待餘下賽事好睇只係奢望。

美斯今夏未「開齋」、巴西低處未算低，新星安迪歷上仗擔正全場除開波一腳，無法成功傳送；歐洲代表麥巴比爆鼻骨連射術也失靈，同應屆歐洲金靴獎得主卡尼喺上仗加時戰被換走，法、英主帥大膽到唔使王牌出戰PK戰。睇足球大賽始終要睇星，以前10號仔最有魅力，如今只剩就快33歲嘅哥倫比亞靚佬占士洛迪古斯搶鏡；9號仔喺南美仲有荷西朗當同拿達路馬天尼斯撐住，歐國盃大牌中鋒幾乎隱形，踢咗48場波連埋加時平均每場僅入2.12球，要球迷捱夜睇列強唔識攻、玩戰術？民間調查，今屆歐國盃決賽千祈唔好係法國對英格蘭，免費播都未必吸引。