尋找分組賽的「大衛」
睇世盃，最難忘係「大衛戰勝巨人哥利亞」的奇蹟不斷出現。32年前，阿根廷由球王馬納當拿領軍，揭幕戰竟以0比1受挫最後得9人應戰的喀麥隆；02年法國首戰0比1受挫另一非洲兵塞內加爾，最後潰敗出局。就連大賽專家德國，上屆分組賽受挫墨西哥同南韓包尾畢業。季中搞世盃，一場唔可能嘅敗仗，更隨時擊倒眾星戰意，早啲執包袱放寒假。
首先，主辦國向來表現硬淨，就算史上唯一分組賽出局嘅2010年南非，首場都不敗；卡塔爾近年備戰完整，土炮夾慣夾熟，其主攻「3-5-2」踢法無畏無懼，分組賽對手級數逐漸提升，有利博晉級，首戰唔會怕厄瓜多爾。列強中，歐洲幾隊都有提早冧檔危機，法國氣勢已過，中場缺大將、守龍嘅洛里斯今屆失波多同射手賓施馬有傷。比利時黃金一代過晒氣，後防又老，前鋒要用踢土超嘅巴舒亞伊？提防第一場鬥冒起中嘅加拿大反艇。最佳黑馬，日本更勝南韓，外流歐洲優質兵多，靈活快速嘅「藍武士」化身大衛，同組西班牙、德國未必大熱晉級。