以前做過本地波直播，由港甲跟到港超，做過唔少訪問，所以聽到本地老牌球會南華要求降班，都幾心悒。香港地搞足球，一定同金錢有直接關係，港超聯要求職業化，係就係有助提高水準，但係亦都令唔少球會耍手擰頭——今季港甲冠軍晨曦同次名嘅黃大仙，都齊齊拒絕升班，升降機制無以為繼，咁港超聯仲點維持落去呢？話明叫港超聯，梗係由香港嘅土炮球隊競逐啦，如果夾硬加埋其他地方嘅球隊踢，就完全唔係嗰回事！寧願湊唔夠10隊，小圈子一啲，都總好過唔鹹唔淡呀！八十年代開始倡議港超聯，到2014年至正式開始，要香港足球不斷前進，係需要更多資源同時間，希望港人可以繼續支持本地波！
